|
ԱՄՆ-ում նոր գնային ռեկորդ է սահմանվել. աշխարհի ամենաբարձր գնով վաճառված մեքենան դարձել է 1963թ. Ferrari 250 GTO սպորտային մեքենան: Անհայտ կոլեկցիոները 52 մլն դոլար է վճարել այս հազվագյուտ մեքենայի համար, ինչը մեկ ու կես անգամ գերազանցում է նախորդ ռեկորդը, որը սահմանվել էր 2012թ. հուլիսին: Ի դեպ, 35 մլն դոլար վաճառված այդ մեքենան դարձյալ Ferrari 250 GTO էր՝ 1962թ. արտադրության :
Ferrari 250 GTO մոդելը վաղուց է հայտնվել ամենաթանկարժեք ու հազվագյուտ մեքենաների վարկանիշային ցուցակների 1-ին տեղերում: Արտադրվել է ընդամենը 39 նման մեքենա, որոնց մեծամասնությունը պատկանել են նշանավոր մրցարշավորդներին կամ հանրաճանաչ մարդկանց: Այսպես, նախորդ տարի վաճառված ռեկորդակիր Ferrari-ն պատկանել է բրիտանացի ճանաչված մրցարշավորդ Ստրլինգ Մոսսին:
Ինչ վերաբերվում է նոր ռեկորդակիրին, ապա այն 15 տարի առաջ ձեռք էր բերել ամերիկացի կոլեկցիոներ Պոլ Պապպալարդոն: Վերջինս մի քանի տարի առաջ այն վաճառում է մեքենաների իսպանացի մի գիտակի: Հենց նա էլ 2013թ. հոկտեմբերի սկզբին կնքում է 52 մլն դոլարի այս գործարքը: Հայտնի չեն այս սպորտային Ferrari -ի ոչ վաճառողի, ոչ էլ գնորդի անունները:
Ֆինանսկան մասնագետները պնդում են, որ դասական ու հազվագյուտ մեքենաների շուկան ամենաեկամտաբերն է այսօր: Հեշտ ու արագ հարստանալու լավագույն տարբերակներից է շահավետ կերպով գնել ու առավել շահավետ վաճառել հազվագյուտ մեքենա: Իսկ նման մեքենաների գները աճում են օրեցօր, ավելի արագ, քան արվեստի գործերի կամ թանկարժեք զարդերի գները:
|
Announcements
Carfans network
Սպորտային Ferrari-ն վաճառվել է ռեկորդային գնով՝ 52 մլն դոլարով
