Տոկիոյում կներկայացվի Toyota GT 86-ի նոր «լիցքավորված» տարբերակը

Toyota GT 86-ի առավել սպորտային կարողություններով օժտված տարբերակը Տոկիոյի ավտոսրահում կներկայացվի ընկերության սպորտային գործընկեր Gazoo Racing ստուդիայի կողմից, հաղորդում է vesti.ru-ն:

Համացանցում տարածված թիզերներից կարելի է ենթադրել, որ սպորտային մեքենան պետք է ստանա ամբողջովին վերափոխված արտաքին: Բացի այդ, թյուներները լրջորեն աշխատել են նաև մեքենայի շարժիչի վրա:

 

Toyota GT 86 և Subaru BRZ համանման կուպեների զույգը դեռ պաշտոնական «լիցքավորված» տարբերակ չունի, և դա հնարավորություն է տալիս թյուներներին իրենց մտքի ողջ թռիչքը ներդնել:

 

Նախատիպը, որն այս ամսվա ընթացքում Տոկիոյում պետք է ցուցադրի Gazoo Racing-ը, հնարավոր է, որ սերիական մարմնավորում չստանա, սակայն ևս մեկ անգամ ցույց կտա, թե ինչպիսին կարող է լինել այդ մեքենայի ամենաարագընթաց տարբերակը:

Միևնույն ժամանակ, GRMN Sports FR Concept Platinum անվանումը ստացած կոնցեպտի ամբողջական տեսքը դեռ թաքցվում է: Ներկայացվում են միայն որոշ թիզերներ, որոնցով հնարավոր է պատկերացնել, թե որքան գլոբալ կատարելագործում է իրականացվել:

 

Ինչ վերաբերում է ուժային ագրեգատին, ապա օպոզիտային 2լ ծավալով շարժիչի հզորությունը 200–ից բարձրացել է մինչև 330 ձիաուժ հզորության:

Արտադրվող ուժի նման զգալի ավելացում ստացվել է ներմղման տուրբինի և մեխանիկական կոմպրեսորի տեղադրման շնորհիվ:

Բացի այդ, նախատիպի վրա տեղադրվել է 6 աստիճան մեխանիկական փոխանցումատուփ մրցարշավային ինքնաբլոկավորվող դիֆերենցիալով: Մեքենան ստացել է սպորտային կախոցներ և հզոր արգելակներ:

Gazoo Racing-ում նաև համապատասխան անվահեծեր և անվադողեր են ընտրել: GRMN Sports FR Concept Platinum-ը ստացել է 18 դյույմանոց 245/40R18 չափի ռետին դիմացից և 265/35R18՝ հետին սռնիի վրա: