Ներկայացվել է BMW Pininfarina Gran Lusso Coupé նոր մոդելը
Օրերս Сoncorso d’Eleganza Villa d’Este փառատոնում ներկայացվել է Gran Lusso Coupé կոնցեպտը, որը BMW ընկերության և իտալական Pininfarina դիզայներական ստուդիայի համատեղ աշխատանքն է :
2 դիզայներական դպրոցների միասնական աշխատանքի արդյունքում ստեղծված խոշոր կուպեն իր արտաքին դիզայնով փոքր-ինչ հեռացել է բավարիական ընկերության ներկայիս կորպորատիվ ոճից և հիշեցնում նրա ավելի հին մոդելները, մասնավորապես 8-րդ սերիայի մոդելային շարքը: BMW 1980-ականների ու 1990-ականների սկզբի մոդելներին բնորոշ գծեր ենք այստեղ տեսնում, խոսքը գնում է դեպի ներս շրջված ռադիատորային ճաղավանդակի և նեղ, փոքր-ինչ ձգված լուսարձակների մասին:
BMW Pininfarina Gran Lusso Coupé-ի համար օգտագործվել է BMW-ի 7-րդ սերիայի մոդելի պլատֆորմը: Երկդռնանի կուպեի անիվային բազան կարճացել է՝ 3210 մմ-ից դառնալով 3027 մմ: 7-րդ սերիայի մոդելի ետևի 3 տեղանոց նստարանի փոխարեն այստեղ 2 հարմարավետ բազկաթոռներ են հայտնվել, որոնց յուրահատուկ սպորտային դիզայն է հաղորդվել: Ընդհանուր չափերով այս կուպեն ավելի փոքր է 7-րդ սերիայից. 5013 մմ երկարություն, 1942մմ լայնություն և 1406 մմ բարձրություն:
Ինտերիերի տարրերն ու սարքավորումները մեծամասամբ վերցված են նորից 7-րդ սերիայից: BMW Pininfarina Gran Lusso Coupé-ի տարբերակիչ առանձնահատկությունն է հանդիսանում նյութերի ու գույների յուրօրինակ ընտրությունը: Սրահի առաստաղն արված է իտալական որակյալ մորթով, իսկ սրահը սև ու դարչնագույն բնական կաշվով: Նորզելանդական ճահիճներից բերված հազվագյուտ փայտից են պատրաստված սրահի որոշ դետալներ:
Յուրօրինակ կուպեի վրա տեղադրված 6,0 լիտրանոց V12 տուրբո շարժիչը 550 ձիաուժ է ապահովում:
Նորույթի գնի ու շուկայում հայտնվելու ժամկետների վերաբերյալ դեռևս տեղեկություններ չեն հաղորդվում:
.png)
