Ավտոլեգենդ - Chevrolet Camaro SS, 1967
Chevrolet Camaro SS ամերիկյան մեքենան ավտոաշխարհի ամենահայտնի լեգենդներից մեկն է համարվում: Արտադրությունը սկսվել է 1967թ. և շարունակվում է մինչ օրս:
Chevrolet Camaro-ն 1-ին անգամ հանրությանը ներկայացվեց 1966թ. սեպտեմբերի 26-ին, իսկ 1967-ից դրվեց սերիական արտադրության: Սա General Motors-ի լուրջ ու բավականին մրցունակ պատասխանն էր Mustang մոդելին, որը արդեն 2 տարի հաջողությամբ թողարկվում էր Ford ընկերության կողմից:
Camaro անվանումը ֆրանսիական «camarade» (ընկեր) բառից էր գալիս, բայց Chevrolet-ի մենեջերները այլ բացատրություն տվեցին մոդելի անվանը 1967թ., նրանց խոսքերով Camaro-ն գիշատիչ փոքրիկ գազանի անվանումն է, որը մուստանգներով է սնվում:
Ford Mustang-ի նման հեղինակություն վայելող մոդելի մրցակցի ստեղծման գործին Chevrolet ընկերությունը բավականին լուրջ էր մոտեցել: Ի սկզբանե մոդելը արտադրության դրվեց 2 տեսակի թափքով՝ կուպե և կաբրիոլետ, 4 տիպի շարժիչներով և 80-ից ավելի արտադրական օպցիաներով: Այս ժամանակահատվածում արտադրված Camaro-ների շարժիչների մեջ ամենահզորը 5.7լ ծավալով V8 շարժիչն էր, որը 255 ձիաուժ էր ապահովում:
1967թ. 221,306 Chevrolet Camaro ավտոմեքենա է արտադրվել, որից 34,411-ը SS ինդեքսն էր կրում, 64,842-ը՝ RS, և 1,002-ը՝ Z/28:
Chevrolet Camaro -ի ամենահանրահայտ և լրացուցիչ օպցիաներով հարուստ մոդելը SS-ն է՝ Super Sport: Մասլ քար դասի այս մոդելը էքտերիերային հիանալի լուծում էր ստացել: Ուռուցիկ սև ռադիատորային ճաղավանդակը, ծածկի (капот) վրայի օդամղիչը (воздухозаборник), որի տակ թաքվնած են յուրօրինակ լուսարձակները, դրա վառ ապացույցն են: Բայց այս նորույթները երկրորդական են թվում, քանի որ հիմնական ու առավել ուշագրավ փոփոխությունները վերաբերվում էին տեխնիկական ցուցանիշներին: Camaro SS-ը համալրվեց 6,5 լիտրանոց 325 ձիաուժ (ավելի ուշ 375) հզորությամբ շարժիչով: Կարևոր է նաև արգելակման էֆեկտիվ համակարգի, աուդիո համակարգի, հիդրավլիկ ղեկի և օդափոխիչի առկայությունը: Chevrolet Camaro SS-ը կոմպլեկտավորվում էր 3 և 4 աստիճան մեխանիկական կամ 2 աստիճան ավտոմատ փոխանցման տուփերով:
1967-68թթ 62, 295 Chevrolet Camaro SS մեքենա է արտադրվել:
Այն ամերիկյան ավտոշուկայում հայտնվեց, որպես ամենահզոր կուպե և այսօր շարունակում է մնալ ամենացանկալի մոդելներից մեկը լեգենդար մեքենաների սիրահարների համար:
Այլ նորություններ
|
Վիդեո
|
