Հանրահայտ մոդելներ - MINI COOPER
Ինքնատիպ տեսք ունեցող այս մեքենան ավտոաշխարհի ամենաարտասովոր մոդելներից է: Չնայած ոչ խոշոր չափերին, անհնար է չնկատել այն: Խոսքը գնում է բրիտանական MINI ընկերության նշանավոր COOPER մոդելի մասին:
MINI COOPER-ի պատմությունը սկսվում է 1961թ-ից, երբ կոնստրուկտոր Ջոն Կուպերը թողարկվեց մոդելի առաջին մոդիֆիկացիան: Նրա մահից հետո մեքենայի կատարելագործումը շարունակեց որդին՝ Մայք Կուպերը: Ի սկզբանե մոդելը աչքի ընկավ հզորությամբ և գրանցեց արագության հիանալի ցուցանիշներ, ինչի շնորհիվ պատշաճ տեղ զբաղեցրեց պահանջարկ ունեցող սպորտային մեքենաների շարքում:
Արտադրողները կանգ չառան և շարունակեցին տեխնիկապես կատարելագործել մեքենան: Արդեն 1963թ. թողարկվեց MINI -ի առավել սպորտային Cooper S մոդելը, որը հատուկ մրցավազքերի համար էր նախատեսված: Կատարելագործված շարժիչը, ամուր կախոցն (подвеска) ու հիանալի կառավարելիությունը օգնեցին այս մեքենային 3 տարի անընդմեջ հաղթող դառնալ Մոնտե Կառլոյի ռալլիում:
1990 թ-ից բրենդը դարձավ ավտոմոբիլային խոշորագույն կոնցեռներից մեկի՝ Rover Group-ի սեփականությունը: Այս խմբի տարած աշխատանքների արդյունքում MINI-ն լայն ճանաչում ձեռք բերեց ողջ աշխարհում և, նույնիսկ, հայտնվեց Գինեսի ռեկորդների գրքում:
Rover Group-ի և BMW կոնցեռնի միավորումից հետո (1994թ.) մոդելի կատարելագործումը շարունակեցին գերմանացի մասնագետները, որոնց ջանքերի շնորհիվ 2000թ. թողարկվեց MINI COOPER-ի երրորդ սերունդը:
Ժամանակակից MINI COOPER-ը իրենից ներկայացնում է դասական ձևի և նորագույն տեխնոլոգիաների հիանալի համադրություն: Այն դարձել է 4 տեղանի, բայց դռները շարունակում են մնալ երկուսը: Հագեցած է հզոր լայնակի տեղադրված շարժիչով, առջևի քարշակով և անվտանգության էֆեկտիվ համակարգով: Նրա գլխավոր խաղաքարտը շարունակում է մնալ հիանալի կառավարելիությունը ճանապարհի վրա:
Սակայն այսօր ավտոմոբիլային նորաձևության նոր միտումները ավելի բարձր պահանջներ են ներկայացնում մոդելի արտաքին տեսքի հարցում: Այդ է պատճառը, որ 2004-ին COOPER -ը որոշ արտաքին փոփոխության ենթարկվեց, զարդարվեց նոր ռադիատորային ճաղավանդակով, առջևի բամպերի վրա ավելացան հակամառախուղային նորաձև լապտերներ: Գունային փոփոխություն նույնպես կատարվեց. այժմ MINI COOPER-ի թափքը երկգույն լուծում է ստացել: Իսկ երկուական սպիտակ գծերը կողքերից մոդելին ավելի յուրօրինակ տեսք են հաղորդում:
Այսօր մոդելը տարբեր մոդիֆիկացիաներով է ներկայանում. Seven, Park lane, Checkmate և այլն: Առավել հանրահայտ է կաբրիոլետը, որը ընդգծում է իր տիրոջ կարգավիճակը: Ժամանակակից MINI COOPER-ը հագեցած է Peugeot-Citroёn արտադրության նոր շարժիչով, որը 120 ձիաուժ հզորություն է ապահովում և 6 աստիճան փոխանցման տուփով: Նորույթ են էլէկտրակառավարվող ղեկն ու բանալիին փոխարինած ստարտ կոճակը: Լրացուցիչ օպցիաների լայն ընտրության հնարավորություն ունեն գնորդները՝ կախված իրենց ճաշակից:Ուղևորների անվտանգության ու հարմարավետության առումով MINI COOPER-ը պահպանում է առաջատարի դիրքը մի շարք հանրահայտ մոդելների շարքում:
Լեգենդար այս մոդելի կոմպակտ չափերը, տեխնիկական հիանալի ցուցանիշները, հարմարավետությունն ու ներկայանալի տեսքը այն երազանք են դարձել միլիոնավոր ավտոսիրողների համար արդեն 50 տարի:
Այլ նորություններ
|
