Հանրահայտ մոդելներ - BMW 5 series E39
ԺԱՄԱՆԱԿԱԳՐՈՒԹՅՈՒՆ
1995թ. Ֆրանկֆուրտյան ավտոսրահում կայացավ 5-րդ սերիայի BMW-ի նոր՝ թվով 4-րդ սերնդի մոդելի ցուցադրությունը, որը հայտնի է ЕЗ9 ինդեքսով: Կարճ ժամանակահատվածում նրան հաջողվեց մեծ թվով երկրպագուներ ձեռք բերել ու արժանանալ բազմաթիվ գովեստի խոսքերի: Այս մոդելը յուրօրինակ խառնվածք է ձեռք բերել՝ շնորհիվ առջևի նեղ լուսարձակների, էլեգանտ և ամուր հետին հատվածի և ռադիատորը ծածկող ինքնատիպ վանդակաճաղերի:
BMW-ի նոր տարբերակում (նախորդ E34-ի համեմատ) փոքր-ինչ մեծացել է թափքը. երկարությունը 55 մմ- ով, լայնությունը՝ 49 և բարձրությունը՝ 23; 70 մմ-ով մեծացել է նաև անիվային բազան: Թափքն ավելի է ամրացել, որի շնորհիվ մեքենան դարձել է առավել կառավարելի և անվտանգ: Քաշը սակայն չի ավելացել, քանի որ մետաղային մասերը հիմնականում ալյումինից են արվել:
Ետևի քարշակի անթերի կառուցվածքը հիանալի ընթացք է ապահովում մեքենայի համար: Սրահը արված է տրադիցիոն ոճով, անիվային բազայի մեծացման շնորհիվ ավելի հարմարավետ են դարձել ետևի նստատեղերը:
1997թ-ի գարմնանից E-39-ի արտադրական շարքում հայտվեց Touring ունիվերսալը՝ BMW 540i, որը համարվում է սերիական արտադրության ամենաարագընթաց ունիվերսալն աշխարհում:
 
Հաջորդ, 1998թ-ի սեպտեմբերից արտադրության մեջ մտավ M5-ը. մեքենայի վրա տեղադրվեց 5-լիտրանոց V8 S62 շարժիչ, որը հնարավորություն տվեց 100կմ/ժ արագության սահմանը հաղթահարել 5,3 վայրկյանում: Առաջին անգամ BMW-ի սերիական արտադրության մոդելի հզորությունը հասավ 400 ձիաուժի: Ի դեպ, արտադրվում է միայն 6 աստիճան մեխանիկական փոխանցման տուփով:
1999թ. մոդելը արտաքին փոփոխության չենթարկվեց, սակայն բավականին վերափոխվեց շարժիչը: Գործածության մեջ դրվեցին VANOS, DOBLE VANOS համակարգերը: Կրճատվեց նաև վառելիքի ծախսը:
Արտադրության դրվեց նաև 530d ինդեքսը կրող նորույթը՝ հագեցած 184 ձիաուժ դիզելային շարժիչով, CommonRail մղման համակարգով և միջանկյալ սառեցման համակարգով: Առավելագույն արագությունը հասավ 225 կմ/ժ, կրճատվեց վառելիքի ծախսը՝ 6լ 100 կմ-ի համար քաղաքից դուրս վարելու դեպքում: Չնայած նորույթի ակնհայտ առավելությանը իրեն նախորդած 525tds-ի նկատմանբ, վերջինիս արտադրությունը չդադարեցվեց: 
2000թ. հայտնվեց 4 մխոցանի 2 լիտրանոց դիզելային շարժիչով ոչ թանկարժեք 520d: 136 ձիաուժ հզորությունը 1.6 տոննա կշռող Touring E-39-ին թույլ տվեց 100կմ/ժ-ի հասնել 10.9 վրկ-ում: Վառելիքի ծախսը 520i բենզինային Touring-ի համեմատ կրճատվեց 1/3-ով:
525tds-ին փոխարինելու եկավ առավել հզոր 525d: 6 մխոցանի 2.5 լիտրանոց դիզել շարժիչն արդեն ապահովված էր 163 ձիաուժ հզորությամբ և վառելիքի մղման Common Rail համակարգով:
2000թ աշնանը տեղի ունեցավ 5-րդ սերիայի մոդելների առաջին մոդեռնիզացումը, արդիականացումը:
Արտաքինից փոփոխված ՛՛հնգյակին՛՛ ճանաչելի են դարձնում թափանցիկ բլոկ-լուսարձակները՝ դեղին շրջանաձև անկյունային ցուցիչներով և առջևի սպոյլերը՝ հակամառախուղային լապտերներով: Սակայն հիմնական փոփոխությունները ընթացային մասին են վերաբերվում. 520i, 525i և 530i մոդելների վրա տեղադրվեց M54 շարժիչը ՝ Double-VANOS համակարգով և 6 մխոցներով: 520i-ի շարժիչը պատրաստվեց նախորդ 2 լիտրանոցի հիմքի վրա, աշխատանքային ծավալը 1991 սմ3-ից դարձավ 2171, հզորությունը նույնպես ավելացավ՝ 150-ից 170 ձիաուժ: Մյուսը 523i-ի 2.5 լիտրանոց շարժիչի կատարելագործված տարբերակն էր, որ պաշտոնապես փոխարինվեց 525i ինդեքսով: Հզորությունը 170-ից հասավ 192 ձիաուժի: 530i-ի համար նախատեսված էր 3 լիտրանոց, 231 ձիաուժ շարժիչը, որ առաջին անգամ տեղադրվեց 3-րդ սերիայի մոդելների վրա:
ԱՆՎՏԱՆԳՈՒԹՅՈՒՆԸ
5-րդ սերիայի BMW-ի E-39 մոդելը համալրված է անվտանգության համակարգերի մի ամբողջական փաթեթով. հակաարգելափակման արգելակման համակարգ, ASC+T, DSC III, DBC: Հատուկ պատվերի դեպքում հնարավոր են նաև այնպիսի օպցիաներ, ինչպիսիք են հայելիների ու ղեկի կարգավորում, ղեկի տաքացում, երկշերտ ապակիներ, RDC (անիվներում օդի ճնշման կարգավորումը), ավտոմատ կլիմատ կոնտրոլ, ինչպես նաև ամբողջական ՛՛էլեկտրոփաթեթ՛՛՝ վարորդի նստատեղի կարգավորման հիշողությամբ:
ԹԱՓՔԸ
Ըստ մասնագետների, Е39-ի թափքը բավականին ամուր է և հիանալի պահում է հարվածը, սրահը կարծես պաշտպանիչ պարկուճում լինի, ուղևորները պաշտպանված են 6 անվտանգության բարձիկներով: Այս թափքը, կարելի է ասել, ենթակա չէ կոռոզիայի. նախ մետաղը պատված է որակյալ, հակակոռոզիալ լաքաներկային ծածկույթով, մյուս կողմից ներքևի հատվածն ամբողջությամբ ցինկապատ է:
ՍՐԱՀԸ
Չնայած արտաքին չափերին, սրահն այդքան էլ ընդարձակ չէ: Ետևի նստարանին հարմարավետ կարող են տեղավորվել 2 ուղևոր: Իսկ դրա բարձր դիրքն ու գլխատեղերը խանգարում են վարդորդին ետևի տեսարանն ավելի լավ տեսնել:
Ի դեպ, արտադրողները 5-րդ սերիայի ռեսթայլինգից հետո ամբողջական փաթեթին ավելացրին ՛՛ոսկե՛՛ բանալին. դա միկրոչիպով բազմաֆունկցիոնալ բանալի է, որում առկա է մեքենայի մասին ողջ ինֆորմացիան( արտադրման թիվը, կոմպլեկտացիան, ագրեգատների համարները, իրական վազքը և այլն): Մեկ այլ բանալիով հնարավոր չէ շարժի գցել մեքենան: Յուրաքանչյուր մեքենա ունենում է 3 բանալի՝ վարորդի նստատեղի կարգավորումների հիշողությամբ:
ԸՆԹԱՑԱՅԻՆ ՄԱՍՆ ՈՒ ԹԵՐՈՒԹՅՈՒՆՆԵՐԸ
Բավարիական շարժիչներն ունեն նաև թույլ տեղեր. ժամանակի ընթացքում տերմոստատի պլաստմասե ծածկը, ինչպես նաև հովացման համակարգի բաքը կարող են ճեղքվել՝ առաջացնելով անտիֆրիզի արտահոսք: Սա կարող է բերել գերտաքացման, որն էլ բավական վտանգավոր է շարժիչի համար: Քիչ չեն նաև դեպքերը, երբ 8-մխոցանի М62շարժիչներում շարքից դուրս է գալիս գեներատորը , կամ ներդիրի (прокладка) փականից յուղի արտահոսք է տեղի ունենում:
E39-ի շարժիչը 350-500 հազար կմ ընթացք է նախատեսում, սակայն ճիշտ շահագործելու և յուղը ավելի հաճախ ՝ 8-10 հազար կմ-ից հետո փոխելու դեպքում հնարավոր է ընթացքն ավելի երկարացնել: Ընդ որում, Vanos համակարգը հնարավորինս որակյալ յուղ է պահանջում:
ՓՈԽԱՆՑՄԱՆ ՏՈՒՓԸ
5-րդ սերիայի E39 թափքով բոլոր մոդելները ետևի քարշակ են՝ 5 կամ 6 աստիճան մեխանիկական և 5 աստիճան ավտոմատ Tiptronic փոխանցման տուփերով: Մասնագետները ուշադրություն դարձնելով ՛՛ավտոմատի՛՛ կառուցածքային առանձնահատկություններին, պարզեցին, որ պադոնի և ֆիլտրի միջև տարածությունը շատ փոքր է: Ոչ ճշգրիտ վարելու դեպքում հնարավոր է պադոնը թեքվի ու ֆիլտրը փչանա, որն էլ շարքից կհանի փոխանցման տուփը: ՛՛Ավտոմատի՛՛ յուղը նախատեսված է նրա ողջ գործունեության համար, բայց առանց թերությունների աշխատելու համար խորհուրդ է տրվում 60 հազ. կմ-ից հետո փոխել այն: Ավտոմատ փոխանցման տուփը ճիշտ կլինի վերանորոգել 250-300 հազ. կմ վարելուց հետո : Թե՛ մեխանիկական, թե՛ ավտոմատ փոխանցման տուփից 150 հազ. կմ-ից հետո նկատվել է յուղի արտահոսք :
ՀԱՐՄԱՐ Է ԱՐԴՅՈ՞Ք ՈՒՆԵՆԱԼ ԱՅՍ ՄԵՔԵՆԱՆ
5-րդ սերիայի BMW E 39 խորհուրդ է տրվում գնել առավել ապահովված մարդկանց: Բացի այն, որ մեքենան էժան չէ, բավականին մեծ գումար է պետք նաև այն պահելու համար: Բիզնես դասի այս ավտոմեքենան հուսալի է, բայց եթե վերանորոգման անհարաժեշտություն առաջացավ, բավական թանկ կարժենա մեքենայի տիրոջ համար: Այն նախատեսված է դինամիկ ընթացքը գերադասողների համար, բայց համաձայնվեք, որ մեքենան այդքան էլ պրակտիկ չէ և դրանով զիջում է իր մրցակիցներից շատերին:
Նախորդ դարավերջին BMW E 39-ին հաջողվեց դառնալ պաշտամունքային մոդել աշխարհի ավտոսիրողների համար, իսկ 2003թ-ից նրան փոխարինելու եկավ նորացված տարբերակը՝ E 60 թափքով:
Հայ ավտոսիրողները այսօր էլ շարունակում են բացարձակ սեր ու համակրանք դսևորել 5-րդ սերիայի BMW E 39-ի նկատմանբ:
Այլ նորություններ
|
Վիդեո
|
