Ֆրանկֆուրտում բացվել է 65-րդ միջազգային ավտոցուցահանդեսը
Մայնի Ֆրանկֆուրտում իր աշխատանքներն է սկսել 65-րդ հոբելյանական միջազգային ավտոցուցահանդեսը: Այստեղ հարյուրից ավելի մասնակիցներ ներկայացնում են իրենց արտադրանքը:
Ինչպես արդեն նշել ենք, այս ցուցահանդեսն իր աշխատանքները սկսել է 115 տարի առաջ՝ Բեռլինում և մինչ օրս իր կարևորությամբ չի զիջում ոչ մեկին:
Մենք բազմիցս անդրադարձել ենք Ֆրանկֆուրտում ներկայացվելիք նորույթներին և մանրամասն ներկայացրել դրանք, այժմ մեկ անգամ ևս անդրադարձ կատարենք և տեսնենք ինչ մեքենաներ են ցուցադրվում այսօր համաշխարհային կարևորության այս սրահում:
Ավտոցուցահանդեսը պաշտոնապես անց է կացվելու սեպտեմբերի 12-22-ը: Պաշտոնական բացումից առաջ 2 օր՝ սեպտեմբերի 10 և 11 -ին սրահը բաց կլինի լրագրողների ու մասնագիտական դասի համար:
Այս տարի գերմանական ավտոսրահը խիստ բազմազան է. ներկայացված են արտասովոր կոնցեպտներ ու սուպերքարեր, հիբրիդներ ու էլէկտրոքարեր, S-Class -ը՝ իր տաբեր մոդիֆիկացիաներով, մեծ ու փոքր բազմաթիվ կրոսսովերներ:
Audi Nanuk
Առաջինը ցուցահանդեսի այցելուներին հաճելիորեն զարմացրեց Volkswagen կոնցեռնը: Հանրության ուշադրությունը գրավեց Audi Nanuk կոնցեպտը, որը ընկերության կողմից գաղտնի էր պահվել և մինչ այս չէր ներկայացվել: Կոնցեպտի սիրտը հանդիսանում է 5.0 լ աշխատանքային ծավալով 10 գլանային շարժիչը, որի հզորությունը 544 ձիաուժի է հասնում: Լայնաքարշակ այս մոդելը 100 կմ/ժ -ի սահմանը հատում է 3.8 վրկ-ում, իսկ առավելագույն արագությունը 305 կմ/ժ է: Վառելիքի ծախսը 100 կմ-ի համար 7.8 լիտր է:
Bentley Continental GT V8 S
Bentley -ն ներկացրել է Continental GT կաբրիոլետի V8 S մոդիֆիկացիան, որը նրա սպորտային տարբերակն է: 20 լրացուցիչ ձիաուժ և սպորտային կախոց են ստացել նոր կուպեն ու կաբրիոլետը: Վաճառքը կսկսվի հավանաբար հաջորդ տարվանից:
Lamborghini Gallardo LP 570-4 Squadra Corse
Իտալական ավտոկոնցեռնը Ֆրանկֆուրտ է բերել հերթական նորույթը: Gallardo LP 570-4 Squadra Corse-ը նախատեսված է սպորտը փողոց տեղափոխելու համար: Այն իրոք նման է մրցավազքային բոլիդի, դա միայն տեսքին չի վերաբերվում, այլ նաև տեխնիկական ցուցանիշներին:
BMW
Նորույթների մի ամբողջ շարք է ներկայացրել BMW կոնցեռնը. i3 էլէկտրոմոբիլ, i8 հիբրիդային սպորտքար, X5 -ի նոր սերունդը և սա դեռ ամենը չէ:
Էկոլոգիական մոդելների i դասի 1-ին ներկայացուցիչն է i3 էլէկտրոմոբիլը, որը միայն էլեկտրոշարժիչով 160 կմ կարող է ընթանալ, այն 170 ձիաուժ հզորություն ունի:
Այս շարքին պատկանող i8 -ը մեծ ուշադրության արժանացավ այս ցուացահանդեսում: Նրա ուժային արսենալը համալրում են 1,5 լիտրանոց 215 ձիաուժ հզորությամբ բենզինային և 128 ձիաուժանոց էլեկտրոշարժիչները: 100 կմ/ժ արագության հասնում է ըմդամենը 4,6 վրկ-ում:
Եթե i3-ը և i8 -ը դեռ նոր պիտի նվաճեն ավտոշուկան , ապա երկրպագուներին շատ լավ ծանոթ է X5 մոդելը, որը ներկայանում է փոփոխված դիզայնով ու չափերով:
BMW-ն Ֆրանկֆուրտում ցուցադրել է նաև Active Tourer Outdoor կոնցեպտը, BMW 4-Series նորույթը, 3-Series կուպե և կաբրիոլետ մոդելները և 5- Series նորացված մոդելը:
Audi A3 Cabriolet
Audi -ն ներկացրել է А3 կաբրիոլետի նոր սերունդը: Վաճառքը կսկսվի արդեն ցուցահանդեսից հետո: Նորույթը ներկայանում է 2 տեսակի բացվող տանիքով և 5 տեսակի շարժիչներով՝ 3 բենզինային և 2 դիզելայնի: Ամենահետաքրքիրը կլինի խոստացված 2 լ ծավալով 300 ձիաուժ հզորությամբ տուրբո շարժիչը, որը կհամալրի S3 Cabriolet-ը:
Volkswagen Golf Sportsvan
Volkswagen Golf Sportsvan կոնցեպտը, ինչպես հայտնում են արտադրողներն արդեն պատրաստ է թողարկման: Այն Golf Plus կոմպակտվենի նախատիպն է, որը կհայտնվի Golf -ի 7-րդ սերնդի ընտանիքում:
Mercedes-Benz Concept S-Class Coupe
Կոնցեպտուալ S-class կուպեն, չնայած անվանումին, ավելի շատ հիշեցնում է CLA կոմպակտ սեդանը: Այն 450 ձիաուժ հզորությամբ տուրբո V8 շարժիչ է ստացել , իսկ առջևից ստերեոտեսախցիկներ են տեղադրված: Կուպեի երկարությունը գերազանցում է 5 մետրը:
Infiniti Q30
Ըստ արտադրողների, հեչբեքի ու կրոսսովերի այս յուրօրինակ համադրությունը միտում ունի դառնալ ընկերության ամենահանրահայտ մոդելը, որը նախատեսված է առավել ակտիվ ավտոսիրողների համար:
Nissan X-Trail
.png)
Nissan ընկերությունը գերմանական ցուցահանդեսում ներկայացրել է 2007 թ-ից արտադրվող X-Trail կրոսսովերի նոր սերունդը, որը բոլորովին նոր դիզայնով է հանդես գալիս:
Kia Niro
Էքստրավագանտ Kia Niro կոնցեպտը պատկերացում է տալիս կորեական դիզայնի նոր ուղղության մասին:Այս հիբրիդային ուժային ագրեգատով է հագեցած և սերիական արտադրության կդվի 2 տարուց: Ընկերությունը ցուցադրել է նաև արտադրության պատրաստ Soul մոդելը:
Porsche 918 Spyder
Porsche-ն ներկայացել է 918 Spyder հիպերքարի հիբրիդային տարբերակով: Ուժային համակարգը կազմում են 608 ձիաուժանոց V8 -ը և 2 էլէկտրոշարժիչ: Միասին նրանք մեքենային հաղորդում են 887 ձիաուժ հզորության: 100 կմ/ժ արագության համար 2,8 վրկ է անհրաժեշտ, իսկ մաքսիմալ արագությունը 345 կմ/ժ է:
Արտադրական ծավալը 918 օրինակ է կազմում, Եվրոպայում այս հիպերքարի արժեքը կկազմի 645 000 եվրո:
(շարունակելի)
Այլ նորություններ
|
